gladdi-addore

Entstehigsgschicht vo de Gladdi-Addore 13+12

Anno 1956 bis zer Fasnacht 1960 hetts durch Ydritt vo ainige Melodiebleeser by dr Guggemuusig BAGGEMUGGE e zinftige Uffschwung gää und me darf do rueig saage es isch sälli Zyt aini vo de beschte, wenn nyt gaar die beschti Guggemuusig z’Basel gsy.

S’isch gaar dr Fall gsy dass sich d’Lyt umm d’Grammophonblatte grisse hänn, wo mit em Baggemuggepotpouri beschbielt gsy sin, das het natyrlig näbscht andere Iinahme durch’s guete schbiele au Gäld in d’Kasse gäh.

Leider hänn an dr Generalversammlig noh dr Fasnacht 1960 ainigi alti Baggemüggeler, wo mir maischte Aktivi nit emool kennt hänn, e Aadraag gstellt, sy welle jetzt e alti Garde grinde. Do sinn ainigi Aktivi zämmegschtande und hänn a däre GV dr Uustritt gäh.

Im Mai hänn e Dail vo de Uusträttene denn zuenere Grindigsversammlig yglade will me jo witters het welle uffträtte und dr Plausch am Guggemuusig schbiele ha.

Am 1.–3. Juni 1960 het me scho am Unifescht am undere Heuberg e Baiz ybernoo und isch zem erschte Mool underem Namme Gladdi-Addore a dr Effentlichkait uffdrätte.

Jetzt aber d’Erklärig iber unsere Namme:

Mer hänn uns gsait mer wänn in dr Zuekunft nimme meh wie 25 Mitglieder sy, (demit nit wider e paar alti e Alti Garde grinde wänn). Mer wänn aber au nie weniger als 12 Mitglieder sy, (drmit me anere Fasnacht doch 4 Raihe vonere Dreierkolonne bsetze ka)
 
aine meh als s’Minimum ergit s’Maximum, also: 13 + 12 = 25
           
Die Gugge soll e ADDITION oder e Zämmezug vo GLADDE Sieche sy.
Und e so het me sich gainigt an däre Grindigsversammlig im Mai 1960 und dr Vorschlag iber dr Namme fyr die neiy Guggemuusig aistimmig aagnoh, wo vom Menz Sprecher stammt:

Gründungsmitglieder GLADDI – ADDORE 13+12 1960